my Konkani Article - ಮಾಂಯ್ ಮ್ಹಳ್ಳೆಂ ದಿರ್ವೆಂ ...

http://konkanimilan.com/km/index.php?action=sahithy_inner&type=61

"ಘರಾಂತ್ ಏಕ್ ವ್ಹಡ್ಲಿಮಾಂಯ್ ಆಸೊಂಕ್ ಜಾಯ್"- ಮ್ಹಣ್ ಅಮೆರಿಕಾಚೊ ಪ್ರಖ್ಯಾತ್ ಬರಯ್ಣಾರ್ ಲುಸಿಯಾ ಮೆ ಆಲ್ಕೋಟ್ ಸಾಂಗ್ತಾ.
ವ್ಹಯ್, ಸಕ್ಡಾಂಚ್ಯಾ ಜಿವಿತಾಂತ್ ವ್ಹಡ್ಲಿಮಾಂಯ್ ಏಕ್ ಪಾತ್ರ್‌ಧಾರಿ ಜಾವ್ನಾಸಾ ಮಾತ್ರ್ ನ್ಹಂಯ್, ಭುರ್ಗ್ಯಾಂಚ್ಯಾ ವಾಡಾವಳೆಂತ್ ಗರ್ಜೆಚೊ ಏಕ್ ವಾಂಟೊ ಜಾವ್ನಾಸಾತ್. ಆತಾಂಚ್ಯಾ ಕಾಳಾರ್ ವ್ಹಡಿಲಾಂನಿ ಟಿ.ವಿ. ಪಳೆಂವ್ಚ್ಯಾರ್ ವ ದುಸ್ರ್ಯಾ ಖಂಯ್ಚ್ಯಾಯ್ ಕಾಮಾಂತ್ ವ್ಯಸ್ತ್ ಆಸ್ತಾನಾ ಭುರ್ಗ್ಯಾಂಚಿ ಜತನ್ ಘೆಂವ್ಚಿ ಹ್ಯಾಚ್ಚ್ ಮ್ಹಾನ್ ಮನ್ಶಾಂನಿ. ಹರ್ಯೆಕ್ಲ್ಯಾನಿಂ ಸಾಂಗ್ಚೆಂ, ಎಕ್ಲ್ಯಾಚ್ಯಾ ಜಿವಿತಾಂತ್ ಆವಯ್-ಬಾಪಯ್ಚೊ ಪಾತ್ರ್ ಬೋವ್ ಪ್ರಮುಖ್ ಮ್ಹಣೊನ್, ಪುಣ್ ಮ್ಹಜ್ಯಾ ಜಿಣ್ಯೆಂತ್ ಆವಯ್-ಬಾಪಯ್ ಸಾಂಗಾತಾಚ್ಚ್ ವ್ಹಡ್ಲಿಮಾಂಯ್‌ಚೊಯೀ ಪ್ರಮುಖ್ ಪಾತ್ರ್ ಆಸಾ. ಆವಯ್-ಬಾಪಾಯ್ನ್ ಮ್ಹಾಕಾ ಬರೆಂ ಶಿಕಪ್ ದೀವ್ನ್, ಮ್ಹಜಿ ಜತನ್ ಕೆಲ್ಯಾ ಜಾಂವ್ಕ್ ಪುರೊ, ಪುಣ್ ಭುರ್ಗ್ಯಾಪಣಾರ್ ಇಸ್ಕೊಲಾಕ್ ವೆತಾನಾ ವ್ಹಡ್ಲಿಮಾಂಯ್ನ್ ಕೆಲ್ಲೊ ಸಾಕ್ರಿಫಿಸ್ ಬೋವ್ ವರ್ತೊ.
ಮ್ಹಜ್ಯಾ ಗಾಂವಾಂತ್, ಇಸ್ಕೊಲಾಕ್ ವೆಚ್ಯಾ ವಾಟೆರ್ ಉದಾಕ್ ವ್ಹಾಳೊನ್ ವೆಚೊ ತೋಡ್ (ವ್ಹಾಳೊ) ಆಸ್‌ಲ್ಲೊ. 1991 ಥಾವ್ನ್ 2000 ಇಸ್ವೆ ಪರ್ಯಾಂತ್ ಹಾಂವ್ ಮ್ಹಜ್ಯಾ ಸೆಜಾರಿ ಇಷ್ಟಾಂ ಸಂಗಿಂ ಹ್ಯಾಚ್ಚ್ ವಾಟೆರ್ ಚಮ್ಕೊನ್ ತಿಸ್ರಿ ಥಾವ್ನ್ ಧಾವಿ ಕ್ಲಾಸ್ ಶಿಕ್‌ಲ್ಲೊಂ. ಪಾವ್ಸಿಲ್ಯ ದಿಸಾಂನಿ ಹ್ಯಾ ವ್ಹಾಳಾಂತ್ ಉದಕ್ ಭರೊನ್ ವ್ಹಾಳ್ತಾಲೆಂ. ತವಳ್ ಆಮ್ಚಿ ಲಾಂಬಾಯ್ ಚಡ್ ಮ್ಹಳ್ಯಾರ್ ತೀನ್ ಚಾರ್ ಫುಟ್ ಆಸಾತ್. ಮ್ಹಜ್ಯಾ ಬಾಬಾಕ್ ಪಾವ್ಸಾಂತ್ ಭಿಜ್ಲ್ಯಾರ್ ಭಲಾಯ್ಕಿ ಭಿಗಡ್ತಲಿ. ಮಾಂಯ್ ದಿಸ್ಪೊಡ್ತ್ಯಾ ಗ್ರಾಸಾ ಖಾತಿರ್ ಪರ್ಗಾಂವಾಕ್ ಗೆಲ್ಲಿ. ತ್ಯಾ ತೆಂಪಾರ್ ಕೊಡ್ಯಾಳಾಂತ್ ಪಾವ್ಸಾಕ್ ಕಾಂಯ್ ಬರ್ಗಾಲ್ ನಾತ್‌ಲ್ಲೊ. ಹರ್ಯೆಕಾ ಕುಶಿಂನಿ ಆವ್ರ್ ಆನಿ ಪಾವ್ಸಾ ಥಾವ್ನ್ ಜಾಂವ್ಚಿಂ ಆನಾಹುತಾಂ ತವಳ್ ತವಳ್ ಆಯ್ಕೊಂಕ್ ಆನಿ ವಾಚುಂಕ್ ಮೆಳ್ತಾಲಿಂ.
ವ್ಹಾಳ್ ಉತ್ರೊನ್ ಯೆಂವ್ಚೆ ಭುರ್ಗೆ ಕಾಂಯ್ ಚುಕೊನ್ ವೆತಿತ್ ಮ್ಹಳ್ಳ್ಯಾ ಭಿಂಯಾನ್ ಆಮ್ಕಾಂ ಇಸ್ಕೊಲಾಕ್ ಪಾವಂವ್ಕ್ ಆನಿ ಸಾಂಜೆರ್ ಪರ್ತ್ಯಾನ್ ಪಾಟಿಂ ಆಪವ್ನ್ ವ್ಹರುಂಕ್ ಮ್ಹಜಿ ವ್ಹಡ್ಲಿಮಾಂಯ್ ತಯಾರ್ ರಾವ್ತಾಲಿ. ಹರ್ಯೆಕಾ ದಿಸಾ ಫಾಂತ್ಯಾಚ್ಯಾ ಚಾರ್ ವೊರಾಂಕ್ ಉಟೊನ್ ಸಕಾಳಿಂಚೆಂ ಖಾಣ್, ಚಾ-ಕಾಫಿ ಆನಿ ಭುತಿ ತಯಾರ್ ಕರ್ತಾಲಿ. ಆಶೆಂ ಉದ್ಕಾಚ್ಯಾ ಲೊಟಾಕ್ ಭಿಂಯೆನಾಸ್ತಾನಾ ಆಮ್ಚ್ಯಾ ಹಾತಾಕ್ ಧರ್ನ್ ವ್ಹಾಳಾಚ್ಯಾ ಹೆವ್ಶಿನ್-ತೆವ್ಶಿನ್ ಪಾವೊಂಕ್ ಕುಮೊಕ್ ಕರ್ತಾಲಿ.
ತೊ ಏಕ್ ದೀಸ್ ಆಜೂನ್ ಮ್ಹಕಾ ಧೊಸ್ತಾ....
ದೀಸ್-ರಾತ್ ಪಾವ್ಸ್ ಆಸ್‌ಲ್ಲ್ಯಾ ವರ್ವಿಂ, ವ್ಹಾಳಾಂತ್ ಬೊವ್ ಚಡ್ ಉದಕ್ ವ್ಹಾಳ್ತಾಲೆಂ. ಉದಾಕ್ ಆಮ್ಚ್ಯಾ ಪೆಂಕ್ಡಾ ಪರ್ಯಾಂತ್ ವ್ಹಾಳ್ತಾಲೆಂ. ತರೀ, ತಿಚ್ಚ್ ವಾಟ್ ಶಿವಾಯ್ ದುಸ್ರಿ ವಾಟ್ ನಾತ್‌ಲ್ಲಿ. ವ್ಹಾಳಾಚ್ಯಾ ಮಧ್ಗಾತ್ ಪಾವ್ತಾನಾ ಆಮ್ಚೆಂ ಸೆಝಾರಿ ಫಿಲೊಮೆನಾ ಪಾಂಯ್ ಚುಕೊನ್ ವ್ಹಾಳಾಂತ್ ಪಡ್ಲೆಂ. ಮ್ಹಜ್ಯಾ ಭಾವಾಕ್ ಉಪ್ಯೊಂವ್ಕ್ ಕಳಿತ್ ಆಸ್‌ಲ್ಲೆಂ ಜಾಲ್ಲ್ಯಾನ್ ತೊ ವ್ಹಾಳಾಕ್ ಉಡ್ಲೊ. ಮ್ಹಜ್ಯಾ ಮಾಂಯ್ನ್ ಸುಮರ್ ಧಾ ಫರ್ಲಾಂಗ್ ಪಯ್ಸ್ ಗಾದ್ಯಾಂತ್ ಕಾಮ್ ಕರ್ತೆಲ್ಯಾಂಕ್ ಬೊಬಾಟ್ ಘಾಲ್ನ್ ಆಪಯ್ಲೆಂ. ತಿತ್ಲ್ಯಾರ್ ಚೆಡುಂ ಮುಕೆಲ್ ವ್ಹಾಳಾಕ್ ಶಿರ್ಕಾಲ್ಲೆಂ ಆನಿ ತಾಚ್ಯಾ ಪಾಟ್ಲ್ಯಾನ್ ಮ್ಹಜೊ ಭಾವ್ ಉಪ್ಯೆತಾಲೊ. ಆನಿ ಖಂಯ್ ಚೆಡುಂ ವ್ಹಾಳಾ ಥಾವ್ನ್ ಸಕಯ್ಲ್ ಪಡೊಂಕ್ ಜಾತಾನಾ, ಮ್ಹಜ್ಯಾ ಭಾವಾನ್ ತಾಚ್ಯಾ ಕೆಸಾಂಕ್ ಧರ್ನ್ ಪೊಟ್ಟು ಬಾಂಯ್ ಕುಶಿನ್ ಉಡುಲೆಂ. ಆಶೆಂ ಚೆಡುಂ ವಾಂಚ್ಲೆಂ. ವ್ಹಡ್ಲಿಮಾಂಯ್ ಸಗ್ಳಿಚ್ಚ್ ಭಿಂಯಾನ್ ಥರ್ಥರೊನ್ ಗೆಲ್ಲಿ. ಉದ್ಕಾ ಥಾವ್ನ್ ಭಾಯ್ರ್ ಆಯಿಲ್ಲೆಂಚ್ಚ್ ಭಾವಾಕ್ ಸರ್ಸರಿತ್ ಪೊಪಾಯ್ಲೆಂ. ಪುಣ್ ತ್ಯಾಚ್ಚ್ ಘಡಿಯೆ ತಾಕಾ ಶಾಭಾಸ್ಕಿಯೀ ಪಾಟಯ್ಲಿ.
ಆಮ್ಚಿ ಮಾಂಯ್ ಗಿಮ್ಶಿಲ್ಯಾ ದಿಸಾಂನಿ, ಆಮಿ ಇಸ್ಕೊಲಾ ಥಾವ್ನ್ ಪಾಟಿಂ ಯೆತಾನಾ ಜನೆಲಾಲಾಗಿಂ ಬಸೊನ್ ಆಮ್ಚಿ ವಾಟ್ ರಾಕ್ತಾಲಿ. ಘರಾ ಪಾವೊಂಕ್ ತಡವ್ ಜಾಲ್ಯಾರ್ ಸೊಧುನ್ ಇಸ್ಕೊಲಾ ಪರ್ಯಾಂತ್ ಚಲೊನ್ ಯೇವ್ನ್ ವಾಟೆರ್ ಕೋಣ್ ಮೇಳ್ಳ್ಯಾರೀ "ಆಮ್ಚ್ಯಾ ಭುರ್ಗ್ಯಾಂಕ್ ಪಳೆಲಾಂಗೀ" ಮ್ಹಣ್ ವಿಚಾರ್ ಕರ್ತಾಲಿ. ಆಮಿಂ ಮೆಳ್ತಾ ಪರ್ಯಾಂತ್ ಸೊಧುನ್ ಗೆಲ್ಲಿಂ ದೃಷ್ಟಾಂತಾಂ ಸಬಾರ್ ಆಸಾತ್. ಕಿತ್ಯಾಕ್ ಆಮಿಂ ಥೊಡೆ ಪಾವ್ಟಿಂ ಸದಾಂಚಿ ವಾಟ್ ಸೊಡ್ನ್ ನವ್ಯಾಚ್ಚ್ ವಾಟೆರ್ ಚಮ್ಕೊಂಚೆಂ ಆಸ್‌ಲ್ಲೆಂ. ಪಪ್ಪಾನ್ ಮಾರ್ತಾನಾ ಆಮಿಂ ಮಾಂಯ್ಚ್ಯಾ ಪಾಲ್ವಾ ಭಿತರ್ ರಿಗ್ಚೆಂ ಆಸ್‌ಲ್ಲೆಂ.
"ಕಿತೆಂಚ್ಚ್ ಸಮಾ ಜಾಯ್ನಾ ಜಾಲ್ಯಾರ್ ವ್ಹಡ್ಲಿಮಾಂಯ್ಕ್ ಆಪಯ್"- ಆಶೆಂ ಮ್ಹಣ್ತಾ ಇಟೆಲಿಚಿ ಏಕ್ ಗಾದ್. ಆಶೆಂ ಘರಾಂತ್ ಕಾಂಯ್ ಜಾಯ್ ಜಾಲ್ಯಾರ್ ತಿಕಾಚ್ಚ್ ಆಪಂವ್ಚೆಂ ಆಸ್‌ಲ್ಲೆಂ. ಸಕಾಳಿಂ ಥಾವ್ನ್ ರಾತಿಕ್ ನಿದೊಂಕ್ ವೆಚ್ಯಾ ಪರ್ಯಾಂತ್ ಆಮಿಂ ತಿಚ್ಯಾ ಬಗ್ಲೆಕ್ ಆಸ್ತೆಲ್ಯಾಂವ್. ನಿದ್ಚ್ಯಾ ವೆಳಾರ್ ಮಾಂಯ್ನ್ ಕಾಣಿಯೊ ಸಾಂಗ್ಚೆ ಆಸ್‌ಲ್ಲೆಂ. ಕಾಣಿ ಸಾಂಗ್ತಾನಾ ತಿಕಾ ಆಮಿಂ ಹುಂಕಾರ್ ಕುಟ್ಟುಂಕ್ ಜಾಯ್. ಕಾಣಿಯೆಚ್ಯಾ ಸುರ್ವಾತೆರ್ ಸುರು ಜಾಲ್ಲೆ ಹುಂಕಾರೆ, ಕಾಣೀ ಮುಗ್ದಾತಾನಾ ಆಮಿ ನಿದೆಚ್ಯಾ ಸಂಸಾರಾಂತ್ ಆಸ್ತಾಲ್ಯಾಂವ್.
ಆಶೆಂ ಸದಾಂಚ್ಚ್ ಇಸ್ಕೊಲಾಕ್ ಯೆಂವ್ಚ್ಯಾ ವ್ಹಡ್ಲಿಮಾಂಯ್ಕ್ ಪಳೆವ್ನ್ ಮ್ಹಜ್ಯಾ ಪ್ರಾಥಮಿಕ್ ಇಸ್ಕೊಲಾಚ್ಯಾ ಮುಖೆಲ್ ಮೆಸ್ತ್ರಿಣಿನ್ ಸಾಂಗ್‌ಲ್ಲೆಂ ಆಸಾಂ "ಅಜ್ಜಿ ಅಂದರೆ ಅಜ್ಜಿ". ವ್ಹಯ್ ಮ್ಹಜಿ ಮಾಂಯ್ ಮ್ಹಳ್ಯಾರ್ ಮಾಂಯ್‌ಚ್ಚ್ ಕಿತ್ಯಾಕ್ ಮ್ಹಳ್ಯಾರ್, ತಿಕಾ ಸಮ ಜಾಲ್ಲ್ಯಾ ದುಸ್ರ್ಯಾ ಮನ್ಶಾಕ್ ಹಾಂವೆ ಎದೊಳ್ ಪಳೆಂವ್ಕ್ ನಾಂ. ಮ್ಹಜ್ಯಾ ಲ್ಹಾನ್ಪಣಾಚ್ಯಾ ದಿಸಾಂನಿ ತಿಣೆಂ ಮ್ಹಕಾ ಹರ್ಯೆಕಾ ಸಂಗ್ತಿಂನಿ ಪಾಟಿಂಬೊ ದಿಲಾ. ಇಸ್ಕೊಲಾಚ್ಯಾ ದಿಸಾಂನಿ ಹಾಂವ್ ಕನಿಷ್ಟ್ ಅಂಕ್ ಜೊಡುಂಕ್‌ಯೀ ಮ್ಹಾಕಾ ಸಾಧ್ಯ್ ನಾತ್‌ಲ್ಲೆಂ, ಶಿಕಾಪ್ ಮ್ಹಳ್ಯಾರ್ ಮ್ಹಾಕಾ ತಿತ್ಲೆ ತ್ರಾಸ್ ದಿಂವ್ಚೆ ತಸಲೆಂ. ಹರ್ಯೆಕ್ ದಿಸಾ ಇಸ್ಕೊಲಾಂತ್ ಟಿಚೆರಿಚೆ ಮಾರ್ ಆನಿ ಘರಾ ಪಪ್ಪಾಚೆ. ಪುಣ್ ಆಜ್ ಹಾಂವ್ ಸ್ನಾತಕೋತ್ತರ್ ಪದ್ವಿ ಜೋಡ್ನ್ ಎಕಾ ಹುದ್ದ್ಯಾಂತ್ ವಾವ್ರ್ ಕರ್ನ್ ಸಮಾಜೆಕ್ ಕಿತೆಂ ಪುಣೀ ದಿತಾಂ ಜಾಲ್ಯಾರ್ ಹಾಕಾ ಕಾರಣ್ ಮ್ಹಜಿ ವ್ಹಡ್ಲಿಮಾಂಯ್‌ಚ್ಚ್ ಮ್ಹಣೊನ್ ಅಭಿಮಾನಾನ್ ಸಾಂಗ್ತಾಂ.
___________________________________________________________________________________________________